இன்று என் கடைசி நாள்

இத்துடன் என்
அரிதாரங்களை
நிரந்தரமாகக் கலைந்தாக வேண்டும்
ஏற்று நடித்த
வேடங்களுக்கு
தொகை தீர்க்கப்பட்டுவிட்டது
உடன் நடித்த
காதலி தாய் நண்பன்
தந்தை
யாரும் இப்போது இல்லை
இதற்குமேல் இம்மேடையில்
எனக்கு இடமில்லை
கடைசி நாள் அணிந்த
ராஜ வேடம் கலைந்து
என் பழம்துணிகள் அணிந்து
உன்னிடம் திரும்புகிறேன்
ஒரு சிறு சுடரேற்றி
எனக்காக நீ காத்திருப்பதாய்
நினைத்து
என் கண்களில்
உண்மையான கண்ணீர்த்துளியொன்று
திரள்கிறது
இல்லம்சேர்கிறேன்
எவ்வளவு துடைத்தும் போகாத
தீற்றலாக எஞ்சிய
அரிதார வண்ணங்களுடன்