கிருதாவை

எவ்வளவு நீளம்
வைக்கலாம்?
நீளமாய் வைத்தால்
ரௌடி
கூராக வைத்தால்
அதையே சாரும்
ஒட்ட எடுத்தால்
ஆர்மி களை
நடுவில் பக்குவமாய்
நிறுத்து
இத்தனை அகலநீளம்
டாக்டர்
இவ்வளவு என்றால்
ஒரு ஆபிஸர்
எழுத்தருக்கு வேறு அளவீடுகள்
கூலித் தொழில்களிலும்
மேல்கீழ் அளவுகளுண்டு
ஏழையெனில்
பணக்கிருதா
பணமிருந்தால் ஏழ்மைக்கிருதா
கண்டுகொள்ளாதவனின் கிருதா
ஆணவக் கிருதா
வெற்றிகளின் கிருதா
அடக்குபவர் அடங்கும்‌போது
ஒரு கிருதா
அடிபணிபவர் அடக்கும்போது
ஒரு கிருதா
மயிர்நீட்சியில் இத்தனை
கணக்குகளா

நான் மண்டவிட்டேன்
காடாக
தலைமயிரை
தாடியுடன் மீசையுடன்
இணைக்கும்‌ பாலமானது
தலைமயிர்வழி நீண்டு முதுகில் ஆடியது

தாடிவழி நீண்டு நெஞ்சைத் தொட்டது
கிருதாவை அளந்து
பின் அளந்து பார்ப்பவர்
எவ்வளவு முயன்றாலும்
காண முடியாது
இவ்வளவு பெரிய வனத்துள்
வந்துபோவது
இயல்பாய் அரும்பும்
ஒரு சிரிப்பு மட்டும்