சின்னூண்டு காலம்

 திடுதிப்பென்றோ

தடதடவென்றோ
படபடப்பாகவோ
முந்தும் வெறியுடனோ
வெல்லும் ஆசையுடனோ
கொள்ளும் இச்சையுடனோ
எதையும் செய்ய வேண்டாமே

ஒரு மலரைப் பார்த்தபடியே
அந்தியைக் கடப்பதுபோல்
இந்த சீன்னூண்டு காலத்தைக்
கடந்துவிடலாமே

காலத்தை அழிப்பது

 சுந்துவுக்கு

தலையில் அடி

ஆட்டோவைக்கூப்பிடு
ஆஸ்பத்திரிக்கு ஓடு

தையலைப்போடு

அழுது கணத்த முகத்துடன்
ஒரு தூக்கத்தைப்போடு

பின் முழித்துக்கொண்ட
சுந்து சிரித்தது
துக்க நெடியெல்லாம்
கலைய ஆஸ்பத்திரியும்
சற்று சிரித்தது

உலகில் ஒரு உயிரும் அறிந்திராத
தூரத்தில் நிற்கும்
தள்ளிவிட்ட சின்னுவை
சுந்து சிறுகரம் நீட்டி
அழைக்கிறது
சின்னு அழுதது

விழுந்து உடைந்த
காலம் அவ்வளவு
குஷியாய் அழிந்து
மறைந்தது