இம்முறையும்

முழுமைகொள்ளாமல்
நீங்கிப்போவதை
சொல்லின்றி
பார்த்துக்கொண்டிருக்கிறேன்
இனி நாம்
மீண்டும் சந்திக்க
ஒரு உலகம் உருவாக வேண்டும்
அதில் உயிர்கள்‌ பெருக வேண்டும்
மானுடம் செழிக்க வேண்டும்
நான் ஏழேழு பிறவிகள் கடக்கவேண்டும்
பின்
காலம் ஒரு அம்பெய்து
என்னை உன் வனத்தில்
வீழ்த்தவேண்டும்
காற்றில் அலுங்கும்
இலை விலக
உன் கிரணமொன்று
என்னிடம்
ஒரு சொல்லுறைக்கும்
நான் நீ மீண்டும் வருவதை
சொல்லின்றி
பார்த்துக்கொண்டிருப்பேன்